Afrikaans: ESO-fotoambassadeur Babak Tafreshi het hierdie merkwaardige beeld van die antennas van die Atacama- Groot Millimeter/submillimeter-rooster (ALMA) teen die agtergrondpraal van die melkweg vasgevang. Die ryk glinster van die hemelruim in hierdie toneel getuig van die onoortreflike waarnemingstoestande op die 5 000 meter hoë Chajnantor-plato in Chili se Atacamastreek.
Hierdie perspektief toon die konstellasies van Carina (die Kiel) en Vela (die Seile). Die melkweg se gekantelde baan word ook deur donker, pluisige stofnewels oorspan. Die helder oranje ster bo die linkerkantste teleskoop is Suhail in Vela, terwyl die soortgelyke oranje ster bokant die middelste teleskoop Avior, in Carina is. Van die drie helderblou sterre wat 'n "L" tussen voorgenoemdes vorm, behoort die linkerste twee aan Vela, en die oorblywende een aan Carina. Reg onder hierdie sterre, in die beeldmidde, pryk die rosige glos van die Carina-newel (eso1208).
ALMA se Europese vennoot, ESO, verskaf 25 uit die 66 antennas van die voltooide teleskoop. Die twee antennas naaste aan die kamera, waarop die noukeurige kyker die kodes “DA-43” en “DA-41” sal uitmaak, is voorbeelde van hierdie Europese antennas. Volgens beplanning sou oprigting van die volle ALMA-rooster in 2013 ten einde loop, maar wetenskaplike waarnemings het reeds voor daardie datum begin.
ALMA is 'n internasionale sterrekundige gerief bestaande uit 'n vennootskap van Europese, Noord-Amerikaanse en Oos-Asiatiese deelnemers in samewerking met die Republiek van Chili. ALMA se oprigting en bedrywighede word namens Europa deur ESO aangevoor, namens Noord-Amerika deur die Nasionale Radioastronomiese Observatorium (NRAO), en namens Oos-Asië deur die Nasionale Astronomiese Observatorium van Japan (NAOJ). Die Gesamentlike ALMA-observatorium (JAO) verskaf ALMA se verenigde leierskap en bestuur ten opsigte van oprigting, ingebruikname en bedryfsaspekte.
Babak Tafreshi is stigter van The World At Night, 'n program om 'n versameling pragtige foto's en tydsverloopvideo's van die wêreld se mooiste en geskiedkundige terreine te skep en dit teen 'n nagtelike agtergrond van sterre, planete en gebeurtenisse in die hemelruim uit te stal.